“Qoraqalpoq-agro” erkin iqtisodiy zonasi tashkil etiladi

Qarorga ko‘ra, Amudaryo, Bo‘zatov, Kegeyli, Qonliko‘l, Qo‘ng’irot, Mo‘ynoq, Nukus, Taxiatosh, To‘rtko‘l, Xo‘jayli, Shumanay va Ellikqal’a tumanlarida jami 875,4 ga er maydonida “Qoraqalpoq-agro” erkin iqtisodiy zonasi tashkil etilganligi, “Qoraqalpoq-agro” EIZ faoliyatini boshqarish “Nukus” erkin iqtisodiy zonasi direktsiyasi” davlat unitar korxonasiga yuklatiladi.

“Qoraqalpoq-agro” EIZ faoliyatining asosiy vazifalari va yo‘nalishlari etib quyidagilar belgilangan:

– zamonaviy issiqxona xo‘jaliklarini, jumladan, gidroponika texnologiyalarini qo‘llagan holda, klaster usuli asosida tashkil etish uchun to‘gridan-to‘g’ri xorijiy va mahalliy investitsiyalar jalb etish, shuningdek, zamonaviy energiya tejovchi issiqxonalar qurish uchun konstruktsiyalar, jihozlar va boshqa butlovchi buyumlar ishlab chiqarishni tashkil etish;

– hududning ishlab chiqarish salohiyatidan samarali foydalangan holda qishloq xo‘jaligi mahsulotlari ishlab chiqarishni ko‘paytirish, ularni chuqur qayta ishlashni kengaytirish va eksport hajmini oshirish;

– qishloq xo‘jaligi mahsulotlari ishlab chiqarishning urug’dan to mahsulotni bozorga etkazib berishgacha bo‘lgan to‘liq jarayonini tashkil etishni rag’batlantirish;

– ko‘chatzorlar, shuningdek, birlamchi urug’chilikni tashkil etish uchun sharoitlar yaratish orqali issiqxona xo‘jaliklarini bozor talabi katta, yuqori hosildorlik xususiyatiga ega qishloq xo‘jaligi ekinlari urug’ va ko‘chatlari bilan ta’minlashning samarali mexanizmlarini joriy etish;

– logistika xizmatlari ko‘rsatishning zamonaviy infratuzilmasini shakllantirish, qishloq xo‘jaligi ishlab chiqarish sub’ektlariga ular tomonidan etishtirilgan mahsulotlar eksportini tashkil etishda ko‘maklashish;

– issiqxona xo‘jaliklarini tashkil etishda zamonaviy resurs tejovchi texnologiyalarni, muqobil issiqlik energiyasi manbalaridan foydalanishni keng joriy etish;

– ishlab chiqarilayotgan mahsulotlarning xalqaro standartlarga muvofiqligini baholash bo‘yicha ilmiy-ishlab chiqarish markazlarini tashkil etish.

Qoraqalpog’iston Respublikasi Vazirlar Kengashi O‘zbekiston Respublikasi Investitsiyalar va tashqi savdo vazirligi, Qishloq xo‘jaligi vazirligi, Savdo-sanoat palatasi va tijorat banklari bilan birgalikda “Qoraqalpoq-agro” EIZ hududida:

– ikki oy muddatda gidroponika texnologiyalarini qo‘llagan holda issiqxona xo‘jaliklarini hamda zamonaviy energiya tejovchi issiqxonalar qurish uchun konstruktsiyalar, jihozlar va boshqa butlovchi buyumlar ishlab chiqarish ob’ektlarini bo‘sh turgan qishloq xo‘jaligiga mo‘ljallanmagan er uchastkalariga joylashtirish bo‘yicha manzilli dasturni ishlab chiqadi va tasdiqlaydi;

– ishlab chiqarilishi o‘zlashtirish uchun taklif qilinayotgan import o‘rnini bosuvchi va eksportga yo‘naltirilgan tayyor mahsulotlar, materiallar va butlovchi buyumlar turlari to‘g’risidagi ma’lumotlarning tadbirkorlik sub’ektlariga muntazam ravishda etkazilishini ta’minlaydi;

– loyihalarni amalga oshirish uchun tadbirkorlik sub’ektlarini jalb etish, ular bilan tizimli ish olib borish, shuningdek, “Qoraqalpoq-agro” EIZ hududida tegishli ishlab chiqarish ob’ektlarini joylashtirish bo‘yicha investitsiya buyurtmanomalarini o‘z vaqtida ko‘rib chiqadi;

– amalga oshiriladigan investitsiya loyihalari biznes-rejalarini ishlab chiqishda tadbirkorlik sub’ektlariga ko‘maklashish bo‘yicha tashkiliy- amaliy choralar ko‘radi.